保住懸疑為吸引 可憐擁躉受折騰

    今期又講波，冇計！投己所愛，投人所好，如果唔寫世界盃，球迷車迷冇癮睇。

    世界盃最震撼事，除巴西、阿根廷衰咗外，莫過於世紀大錯判，特別氣壞捧英球迷。林柏特射入彈楣波，明顯過晒白界，旁證卻瞌眼瞓，球證又走漏眼，更被德國門將急開龍門球呃晒；那邊廂，阿根廷迪維斯頂入恰西波，旁證一樣睇唔到，墨西哥變犧牲品。

    世上冤案錯案多，足球亦唔少，當年阿根廷馬勒當拿上帝之手拍波入英格蘭大門，球證不察，打沉英軍士氣，助長阿根廷氣勢，繼後馬勒當拿連過五人射入世界波淘汰對手。現時老馬帶領的阿根廷隊，迪維斯頂入恰西波後當堂打生，隨後射入本屆最佳入球，淘汰老墨，足球比賽就係咁。

    英格蘭唔好怨天怨地，世事冥冥之中注定。猶憶一九六六年，西德在世界盃決戰英格蘭，靴斯射球越白界判不入，最終被英捧走世界盃。事隔四十四年，英格蘭蝕返一趟，上天總算“公平”？

    國際足聯一向僵化，現今科技足可判斷入球，但仍堅持人性化，拒絕重播問題球，稱會影響比賽節奏，認為咁至引人入勝。畀全世界炮轟後，始考慮增底線旁證，或討論引入龍門白界線科技。現今不少比賽都採用鷹眼，如網球比賽，是否出界或界內，現場一播便知。足球重播問題波畫面，一目了然，不必爭拗，亦減少球迷因不滿判決而引發暴動。國際足聯恐怕球員被罰紅牌、手球等犯規，乜都要睇重播片段，反麻煩多多。

    俗語話“公仔生鬚人做”，規例死，人係生，可規範處理問題入球、禁區是否犯手球等，其他濕星嘢，一律按球證慣常做法。

    國際足聯第一本球例係英國足總撰寫，亦係長期反對科技執法者，今番英格蘭變受害者，亦冇得好怨。

    比賽應公平公正，有理由完善球例，除非係心理變態，睇到人家死得冤枉而開心，看到棄足用手鬼鼠入球而感過癮。

    講修例，有些球類常改例，即如乒乓球，以前歐洲、日本人捧盃，乜事都冇。自從中國乒隊崛起後，外人就對中國搞針對，個波改大細，膠面、發球有限制，廿一分改十一分等等，改來改去查實係眼紅，唔想中國人威，或許有朝一日波板改到葵扇咁大，“吹冰泵”乎！

    羅倫斯