排隊人龍守秩序 亂象似已成過去

　　上海搞世博，咁近城隍廟，唔求籤都要去睇睇，始終係國家大事，世界級博覽，應該捧場。

　　以前世博畀晒先進國家搞，第三世界冇份，今次由中國主辦，乃發展中國家第一次，證明國家國力增強，有江湖地位。世博係展現各國文化、科技產業成果之大型展覽，倫敦舉辦首屆（一八五一年），當年英國係全球經濟強國，展出蒸汽機、織布機等推動工業革命的先進機械，轟動一時，往後亦以類此形式推動，亞洲則以日本舉辦過兩屆。今番由中國主辦，規模歷屆之最，有二百多國區參加，入場人次料達七千萬，尤勝上屆日本的六千萬人次，盛況空前，看來以後交畀人口大國印度搞，或有機會突破人數。

　　上海世博場地大，場館多，行到腳軟。最受歡迎要數中國館，全場最具霸氣，單看百米長投影動畫“清明上河圖”，足大開眼界；其他擁全球最大3D影院的沙特館，以及紫蠶島日本館，似海膽又像蒲公英之英國館，人龍長到冇雷公咁遠，有些要排隊五至七小時；意大利、西班牙、法國、德國等大館，屛幕顯示有排等，觀衆仍一樣有興致。

　　睇大館，一定要預約，否則耗體力，嘥時間。能夠睇到中國館，可還心願矣。

　　各國展館千篇一律省招牌，將國家最醒一面展示人群，就算無先進科技，都會宣揚環保，或介紹本國旅遊，招攬生機。各館特色多係睇片，介紹本國發展，知道一下人家歷史，睇公仔最易接受。

　　世博各館夜景靚絕，流光溢彩，變化萬千，又是另番境界。

　　世博舉辦初期秩序亂，有人爭先恐後，甚至大打出手，但經大會總結經驗，早已秩序井然，儘管間有爭拗瑕疵，但亂象已成過去。文明在內地漸見曙光，惟進速較慢，但只要每人踏出一小步，全中國便會跨進一大步，相信幾年後又有較大的轉變，畢竟十三億三千四百萬人，很難要求個個高質素。

　　此次滬上小遊，感覺交通擠塞得來有秩序，比起年前所見有進步，起碼車輛增多而少聽響“安”催促，不守秩序者，聽地膽講乃其他省份車輛不熟路所致。有晩三坐的士嘗多區美食，搵司機仙人指路，對方亦落力推介，態度不差，相信上海當局世博前做了很多宣傳工作，司機以禮待客，令旅客玩得開心。

　　羅倫斯