分段重整高士德 嚴格監管免缺失

　　城市不動如死水 加強規劃勿務虛

　　高士德下水道重整，初喩交通“黑暗期”，後講“痛苦期”，無論黑暗與痛苦，都唔慌好嘢，主要係工程造成交通擠塞，遍地開花之下，商戶、攤販生意必受影響。

　　高士德逢暴雨或海水倒灌，時有水浸，商戶、居民同樣受影響。長痛不如短痛，當局決心動大手術，亦非攞工夫來做。旣然以邁向世界旅遊休閒中心為目標，冇理由任由遊客、居民涉水行，城市生活質素欠佳，空喊休閒口號等同廢話。有條件，應該唔好整到好。

　　有街坊話，高士德重整下水道，花足年幾，到頭來海水倒灌照浸，落暴雨又要涉水，那就該煨矣。

　　如此一來，當局便要“結婚包生仔”，否則他日有乜依郁，唔止揸住碌竹，而係要扮鴕鳥，壓力還大過巴士阿叔。

　　重整下水道，料有數據支持，唔會膽粗粗落鎚，縱然他日海水倒灌，下段有些微水浸，其他大方向有大改善，都係正面者，天災始終係天災，幾叻高人亦唔會預料到。

　　要城市繁榮，就得配合發展，如果長期不動，就如一潭死水，甚至如專家所言會被邊緣化。如何將澳門打造更宜居？就須着眼加強保育，拓新城規。

　　高士德紅街市段已開挖，行走該段巴士線已移往雅廉訪及美副將。首幾天，可能駕駛者有留意報章及電視新聞，駕車避行該路段，加上取消街頭泊位，暫時唔覺塞車。不過，分段施工各有不同程度影響，掘到要害地段，或會大塞車。

　　有雅廉訪街坊話，自從羊肉店街口設置紅綠燈後，過馬路方便好多。往日過俾利喇街，有車輛急轉彎，亦有車加速直駛，嚇親途人。有時零星途人不斷過路，車龍便塞晒十字路口，阻礙交通。現時有所改善，希望紅綠燈永久設置。話雖如此，紅綠燈後巴士站若有巴士埋站，繁忙時間一樣狂塞，高地烏街車輛想左轉亦難，有駕者試過被困。

　　高士德、三盞燈一帶係普羅大衆購物區，很多市民揸車到此消費，然而本澳車輛不斷增加，卻無措施控制，未來高士德確如官員所講行車必慢，屆時行路快過坐車，當局須未雨綢繆，早絞腦汁矣。

　　羅倫斯