巴阿煞食較襟睇  老英出線仍勢危

    今屆世界盃接連爆冷，繼法國冇得留低後，意大利亦步後塵，齊執包袱。換言之，上屆冠亞軍成難兄難弟，同創蒙羞歷史，死唔眼閉。

    世界盃最修家者 ，莫過於上屆亞軍法國隊，敎練、球員鬧不和，軍心渙散，被淘汰是遲早事。

    球員對敎練積怨深，皆因敎練固執，名宿、球員好意見聽唔入耳，覺得畀人點，好冇面，死要自己嗰套；個別球員亦係攪屎棍，唔聽敎練支笛，特別係臭馬安歷卡，叫佢上前搏殺，偏偏話冇波踢要回防，被調離場，又用粗口省敎練，爭執曝光後驚動法國足總，即炒安歷卡，引起球員罷訓，搞到一鑊泡。

    打波如人生，須有團隊精神，有矛盾，應及時化解；搞分化，只會更沉淪，法國隊全軍盡墨，固然丢臉，搞到家嘈屋閉，更衰畀人睇。最令國家蒙羞者，乃打附加賽靠亨利鬼鼠手球入波淘汰愛爾蘭，令世人不齒，似有報應。

    至於意大利，選人成一大問題，有朝氣球員落選，卻重用四朝元老簡拿華路等過氣功臣，敎練要負責。老簡兩場波失球與其有關，要知對手落場唔會敬老，試問三張六嘢點夠後生仔衝？人有極限，老人球隊始終難敵現代足球，意大利甦醒已遲。

    講十六強，南美巴西、阿根廷對辦。巴西今屆後防穩陣，仍可熱捧；阿根廷鋒將人材多，單美斯已夠照，帶波埋門必掀高潮。該隊只差後防唔夠穩，最驚老馬調兵失策，扮晒敎父，勝利沖昏頭腦。

    歐洲球隊睇好德國、西班牙，前者實而不華，拼勁一流；後者推進悅目，中場煞食，但中前場球員較細粒，打埋身波蝕底，若鋒將托利斯回勇，可增爭勝本錢。

    荷蘭整體表現佳，洛賓若完全康復，將是奪標黑馬。葡萄牙靠C朗查撑篤撑，澳球迷對葡隊有情意結，希望C朗帶起全隊，畀馬交friend開心吓。

    英國歷來不被睇好，爭霸旅程將屢遇強隊，仍然勢危。

    韓國、日本打入十六強，乃亞洲之光。足球是歐美強項，亞洲人體型輸蝕，實際如捉象棋般讓了單車。日本愈戰愈勇，本田圭佑足有一流球星功架，必成大球會爭奪對象。

    期待冠軍決戰南美鬥歐洲，最佳巴西對西班牙，次佳荷蘭對阿根廷。