汽車美容通街有 經營最怕缺人手
威尼斯人停車場最近新設一家汽車美容中心，愛車之人又多一處洗車地方。
此汽車美容中心乃挑戰者，新場光線明亮，從停車場入口遠望即睇到。威記一向要求高，所有商場舖位裝修嚴格，須一塵不染。名店設計悅目，加上管理嚴謹，令逛商場者成為一種享受。停車場同樣要求嚴格，須乾淨企理，唔會見水。
吓，汽車美容中心冇水點洗車？
問起挑戰者朋友，始知係用泡沫搞掂。究竟泡沫與用水洗車是否一樣乾淨，答案OK，泡沫注入潔淨元素，起漬除塵，光潔明亮。睇落又係，嗰日見架名車美容後蠟蠟靚，街外人又點知會係唔使水洗車。現代科技日新月異，泡沫清潔車輛濕濕碎。
泡沫洗車有樣啱聽，潮流興環保，唔用水洗車，可節約食水。現今澳門水資源缺乏，長期要靠內地供水，為響應節水，很多大酒店已調校設備，旣節水，又可慳回若干開支。
地下停車場一向焗熱，車主泊車後離開車廂，都要焗一陣桑拿，洗車技工操作則大汗淋漓，要開動牛角線散熱。但威記場大通風較佳，夏天稍焗，冬天無問題，故而該洗車新場應是全澳地下停車場較理想場地。
挑戰者在澳開業十多年，以前在回力八佰伴最煞食，方便不少Shopping者及消閒客，購物或飮茶後取車，方便至極。昔日亦在新世紀有場，發展至今，除新八佰伴、信達城、關閘信達廣場設場洗車，另在威記及高士德世紀豪庭停車場設點，成連鎖品牌。
澳門洗車美容店舖星羅棋佈，以北區、下環街較多，幾乎每區份都有，普通洗車、打水晶蠟等一應俱全，豐儉由人。在下一向懶洗車，平日有人例行抹抹，
澳門亦有另類汽車美容，以前慕拉士有間專替汽車鋪光潔面膜，日後只要清水洗車，毋須打蠟都光潔如新，泰國師傅手藝高超，曾幫襯過，幾年來兩架錢七仍保持光澤。舊店已結束，新店轉往新城市。
羅倫斯
