車行齊交成績表 經濟好轉樂逍遙

　　澳人回氣袋有錢 整體銷售勝去年

　　經濟復甦，香港車市旺，澳門又如何？

　　答案係“矮仔佬上樓梯—步步高陛”，大多車行成績理想，交到功課。

　　先講日本車，豐田仍是大阿哥，年銷千多輛，繼續拉頭馬，儘管被歐洲車分薄，但旗下車種多，SUV多用途車豐儉由人，部分中價七人車搶手，如NOAH等幾銷得。豐田總體銷售增四成，算唔錯；凌志亦越來越多人擁有，成績表見得人。

　　展望來年，豐田有中小型車發力， RACTIS千五CC接受預訂，新車注入多元化元素，價錢適中，料受歡迎。加上歷年穩打穩紮主打COROLLA，仍被看好。

　　另一塊田本田穩中求勝，各車種都有不同程度增長；日產七人車豪華與經濟實惠兼備，迷你Van SERENA擁有不少捧場客。

　　至於萬事得，厰方近年不斷開發，無論車款及設備都較進取，ZOOM 吓ZOOM吓，吸引不少年輕人及家庭客。細車以2仔最暢銷，款靚價平，泊位易，同其他牌子細車一樣，適合澳門路窄環境，2仔新車小改款，更靚仔。七人車方面，價錢與二千CC差唔多，又可坐多兩人，故而萬事得5幾好賣，一度脫貨等下一水。

　　講到歐洲車，勁矣，若干代理可能笑到合不攏嘴。

　　先講平治，今年好景，銷近五百輛，破歷年紀錄。車種方面，細車獨佔鰲頭，A、B class熱賣，主要價錢平；E系屬新款，訂車者衆，最近始交齊車；S系同級中無敵，越野賣到冇貨。反而C系對手多，三、四十萬同級車多選擇。平治在歐洲車中，銷量仍是領頭羊。

　　講到寳馬，香港威矣，歷史性銷量贏平治。講車種，寳馬亦不少，近年推出多款廿零萬細車，非常抵買，搶走不少日本車客源。三系捧場客最多，X系夠煞食，年來通街見。

　　至於奧迪，可用異軍突起來形容，年前已對此品牌睇好，相信車迷會轉口味，果然今時今日脫胎換骨，A系款靚，Q系有大將台型，總體倍數增長，漸分平治、寳馬一杯羹。加上戰略成功，舖鄰平治，配合靈活經營，搶走若干賓士客，天時地利人和皆有齊。

　　另一“新軍”福士，新代理兼擁煞食新GOLF，賣個滿堂紅，開局良好。

　　市面今年還多了若干名房、超跑及貴價保時捷越野，澳門有錢佬似越來越多！

　　羅倫斯