鐘樓駝俠有眼光 新丁一朝變車王

　　“合皮扭耳”歡呼聲中，世人踏入二○一一，小朋友添一歲，年輕人大一年，長者又賺多三百六十五日。車行新年新希望，祈求生意再大旺。

　　小學年代，新年作文最頭痛，除“光陰似箭，日月如梭”，就唔知用乜形容，年年以此金句循環不息，認為最悶作文堂，不如畫公仔好過。但勢估唔到，細時唔鍾意作文，大時搵食偏偏與文字打交道，《車生晒》專欄車足廿餘年，眞箇光陰快過火箭。

　　試車、寫車，做落幾過癮。童年對玩具車最感興趣，時將早餐錢買塑膠車仔，與同學在地面畫賽車跑道鬥車，希望大個仔時能擁有私家車。那年代，有架電單車已好威水。世事冥冥中註定，今時今日有車濕濕碎，但有機會試剛面世新車，而且唔同牌子，唔同類型，名房、四驅、越野、多用途，無論平貴都會試，甚至飛到外地試全球首發，新車連街邊鬼佬都未見過，也投以艷羨目光。那種試新車投入感和滿足感，外人或難領略到。

　　做此瓣，講興趣，始投入，如果冇此愛好，你叫佢試，除非攞槍指住。點解？生手或認識淺者確怕新車，事關多新設備，唔敢亂摸驚撞壞。

　　車係死物，由人開發，機器當然由人控制，何懼之有。平時多留意車訊，肯鑽硏，幾先進設備，都係舉一反三，認識多便易操控，資深車評人很快便會摸熟性能，就算初時出洋相，只要厰方或代理人員提點，根本無大問題。不過，確實有些好難揸，即如某些超跑會踩到腳軟，甚至難操控。現代某些超跑已注入“搵水元素”，務求令初哥或穿高跟鞋女士易入門，揸得更舒服，一網打盡愛型而技術非精之豪客。

　　同文江穎係汽車發燒友，試車評車同樣經歷一段長時間，經已試到生晒精，間中還落場鬥車，變“追風一族”。江穎少年時已對車甚感興趣，特別鍾情電單車，見人擁新車，旣好奇又心郁郁，但未夠年齡考牌，想學揸，亦冇符。大個仔，識搵錢，有水即買電單車，後來獲“鐘樓駝俠”Camel賞識，加入寫車行列，專攻電單車。及後兩轆與四轆齊揮，業餘試車寫車年復年，佢話如無對車此份興趣與激情，斷估無此動力堅持到今日！

　　羅倫斯