揀自動波電單車，各人有各自標準，最終目的係車要靚、慳油夠力，符合代步之餘，又要有一些個人風格。唔好話要求高，此乃人之常情。光陽最近推出一部Many 50仔，新穎外形加小小復古，迎合現時潮流，輕盈車身低重心，再配合十吋輪胎，小女孩都能夠輕鬆出行。

　　新車採用很多圓形設計，強調仿古做法，就車頭一個圓形大燈，配兩個圓形後鏡，最可愛就係前擋板中央的K字Logo都用圓形LED燈圍住。錶板圓角方形，上面五個警示燈加一個半圓形速度錶，最下再配上小小顯示屛，簡單直接又美觀。平平的座椅下，兩側的輪冚及車架造形，有意大利老牌電單車的味道。但設計師又用上不用顏色的把手膠、同刻滿車仔圖案的腳踏板，年輕化的色彩配襯，仿古之餘又能帶出靑春氣息。新車指揮燈、尾燈等都用LED小燈組合，光之餘又慳電耐用，最過癮係尾燈，亮起尾燈或制動時，十五粒LED膽就構造成一個閃鑽圖形，出色的設計抵比你十個讚。

　　以前提起四衝程燃料噴射50自動波，都會好懷疑有冇力，試揸光陽Many 50，即打破偏見，原來現在推出的四衝燃料噴射50仔居然造得咁好，充足的起步力又唔會標住去，油門扭幾多有幾多，起步後加速夠晒力，周遊本澳，引擎應付有餘。最可愛係慳油，單氣缸引擎配合十六位電腦控制器操作的燃料噴射系統，大大提升引擎的慳油功能，符合台灣五期環保條例。新車用傳統頭尾避震配合，前後輪用簡單的鼓形制動，夠用之餘又能帶出仿古的主題。揸住呢架車好輕鬆舒服，用車或遊車河都係揀佢好，貪佢夠Q可愛，夠晒慳油。

　　光 剛